Belçikadakı «Azərbaycan Evi»nin rəhbəri Bülənt
Gürçam Avropada ölkəmizin təbliğini gücləndirmək
üçün önəmli tədbirlər hazırladıqlarını bildirib.
Dünən Xarici Ölkələrdə Yaşayan Azərbaycanlılarla
İş üzrə Dövlət Komitəsində Belçikada fəaliyyət
göstərən «Azərbaycan Evi» təşkilatının rəhbəri
Bülənt Gürçam mətbuat konfransı keçirdi. O, bu
qurumun Belçikada Azərbaycan səfirliyinin açılmasında,
həmçinin Belçika-Azərbaycan, Avropa-Azərbaycan
əlaqələrinin qurulmasında və inkişafında yaxından
iştirak etdiyini dedi. Azərbaycanın Belçikada
tanıdılması üçün bir sıra işlər gördüklərini,
Avropanın bəzi ölkələrində mədəni tədbirlər, konsertlər
təşkil etdiklərini, qaçkın və məcburi köçkünlərimizə
yardımlar göndərdiklərini diqqətə çatdırdı:
«2002-ci ildə Xocalı soyqırımı ilə bağlı Brüsselin
mərkəzi küçələrində çadırlar qurulub. Bu etiraz
aksiyası zamanı soydaşlarımız həm də imzatoplama
kompaniyası aparıb, erməni vəhşiliklərinə, Azərbaycanlılarla
bərabər, başqa xalqların nümayəndələrinin də etirazlarını
bildirdiyi Belçikanın Xarici İşlər nazirliyinə
təqdim olunub. Soyqırımı əks etdirən və 4 dildə
çap olunan dərgi Belçikada və bir neçə ölkədə
yayılıb».
B.Gürçam bildirdi ki, soyqırımla nəticələnən erməni
təcavüzünün günahkarlarının cəzalandırılması üçün
məhkəmələrə müraciət etmək niyyətindədirlər. 2004-cü
ildə Brüsseldə Dünya Gömrük təşkilatının binası
qarşısında Dədə Qorqudun heykəli qoyulub, prezident
İlham Əliyev heykəlin açılış mərasimində iştirak
edib. B.Gürçam Azərbaycan mədəniyyətinin də ciddi
şəkildə təbliğ olunmasının vacibliyini vurğuladı:
«Hər dəfə yalnız problemlərlə Avropa cəmiyyətinin
qarşısına çıxmaq olmaz. Bir az da mədəniyyətimizi
yaymaq, qədim, milli-mədəni dəyərlərimizi avropalılara
göstrmək lazımdır. Bunun üçün konsert proqramları
düzənləyib, azərbaycanlı sənətçilərin çıxışlarını
təşkil etməyə çalışırıq. Bizim həm də «Eu xəbər»
adlı qəzetimiz çıxır. Əsasən Azərbaycan haqqında
olan bu nəşr indi burada və Türkiyədə də yayılacaq».
B.Gürçam Belçikada və digər Avropa dövlətlərindəki
türk diasporları ilə yaxından əməkdaşlıq etmək
niyyətində olduqlarını dedi. Türkiyə və Azərbaycan
türklərinin hədəfi eyni olduğundan birləşməyin
vacibliyini önə çəkən soydaşımızın sözlərinə görə,
bu zaman diasporumuz, lobbiçiliyimiz də güclənər,
qarşıya qoyulan məqsədlərə daha tez nail olunar.
Belçikada güneyli-quzeyli 10 minə yaxın azərbaycanlı
yaşadığını deyən diaspor qurumunun rəhbəri bildirdi
ki, bu ölkədəki soydaşlarımız daha da fəallaşmağa
çalışırlar, çünki beynəlxalq təşkilatların bir
çoxunun mərkəzi qərargahı Brüssel şəhərindədir.
B.Gürçam Bakıya səfəri zaman Xarici Ölkələrdə
Yaşayan Azərbaycanlılarla İş üzrə Dövlət Komitəsinin
sədri Nazim İbrahimovla görüşdüyünü və yaxın gələcəkdə
görüləcək işlərlə bağlı planlarını onun diqqətinə
çatdırdığını, təklif və təşəbbüslərinin Komitə
sədri tərəfindən bəyənildiyini söylədi. B.Gürçam
bildirdi ki, Dövlət Komitəsi ilə birgə Belçikada
Azərbaycan günləri keçirməyi nəzərdə tutublar.
Onlar Avropa Parlamentinin binasında Azərbaycan
incəsənətinin təbliği məqsədilə rəsm sərgisi təşkil
etmək, 31 mart soyqırımının ildönümü ilə bağlı
tədbirlər keçirmək niyyətindədirlər. Eyni zamanda,
ermənilərin qondarma soyqırımla bağlı tədbirlər
hazırladıqlarını deyən soydaşımız bunun qarşısının
alınması, adekvat cavablar verilməsi üçün fəalliq
göstərəcəklərini diqqətə çatdırdı. «Belçika-Azərbaycan
Evi»nin rəhbəri Bakıya həm də ölkələrarası iqtisadi
əlaqələri inkişaf ekdirmək məqsədilə gəlib. Bakıda
yeni paltar fabriki açdığını deyən Bülənt Gürçamın
sözlərinə görə, burada 50 nəfər yerli azərbaycanlı
çalışacaq. Mütəxəssis kimi isə Belçikada yaşayan
türklər dəvət ediləcək. Bu il aprelin 15-də fabrikin
açılışı olacaq.
Dövlət Komitəsinin ikinci ərazi üzrə şöbə rəisi
Nazim Qaraxanov isə bildirdi ki, Vyanada yaşayan
soydaşlarımız 31 mart soyqırımı ilə əlaqədar şəhərin
küçələrilə ATƏT-in qərargahına qədər yürüş edəcəklər.
O, həmçinin qeyd etdi ki, ermənilərin Avropada
Azərbaycan haqqında yaratdıqları mənfi rəyi dağıtmaq
və tariximizi, mədəniyyətimizi təbliğ etmək üçün
görülən işləri formaca yeniləşdirmək lazımdır
Sevda İlhamqızı
«525-ci qəzet»,
26 mart,2005-ci il
