May ayının 13-də Mətbuat klubunda
Belçikanın paytaxtı Brüsseldə yerləşən «Azərbaycan
Evi» cəmiyyətinin internet saytının təqdimat mərasimi
keçirildi.
Konfransı giriş sözü ilə açan «Azərbaycan Evi» cəmiyyətinin
Azərbaycandakı təmsilçisi Aydın Cəfərov bu cəmiyyətin
yaradıcısı Bülənt Gürçamın 1980-ci ildən bəri gördüyü
işlərə qısa nəzər saldı. O, «Azərbaycan Evi» cəmiyyətinin
uzun illərdən bəri bütün çətinliklərə baxmayaraq
fəaliyyət göstərməsinin və bunun Belçika dövləti
və Belçika-Fransız mədəniyyət mərkəzi tərəfindən
tanındığını bildirdi. Və bu cəmiyyətə Brüssel bələdiyyəsi
tərəfindən yardım göstərildiyini vurğuladı. Tədbirdə
çıxış edən «Azərbaycan Evi» cəmiyyətinin rəhbəri
Bülənt Güraçam cəmiyyətin son iki-üç ildə Belçika-Azərbaycan,
Avropa –Azərbaycan və ayrıca bir neçə Avropa ölkəsində
tanınan beynəlxalq təşkilatdar ilə Azərbaycan arasında
yaranmış mühüm əlaqələrdə tam gücü ilə iştirak etdiyini
və yetərincə müəyyən işlər gördüyünü vurğuladı.
O, cəmiyyətin müxtəlif dövrlərdə Belçikada «Odlu
vətən», «Azərbaycan kültür və informasiya dərgisi»
adı altında jurnallar buraxdığını bildirdi. Onun
sözlərinə görə, cəmiyyət müəyyən vaxtlarda Belçika
və digər Avropa ölkələrində (Hollandiya, Almaniya,
Fransa və.s) xalq sənətçilərimizin və musiqiçilərimizin
müxtəlif konsertlərini təşkil etmişdir.
Onun sözlərinə görə, 2000-ci ildə Belçikada Qarabağ
qaçqınlarına yardım kompaniyası başlatmış, bəzi
türk cəmiyyətləri və Brüsseldə tanınan Türkiyə Cumhuriyyəti
Diyanət işlərinin dəyərli müşaviri Həmrullah Aksarının
yardımları ilə 100 ton geyim paltarı yığılmış, «Azal»
Hava Şirkətinin yardımı ilə Bakıya burdan da Biləsuvardakı
qaçqın düşərgələrinə göndərilmişdir. Təbii ki, bu
fəaliyyətimizi göstərərkən burada adını çəkmədiyimiz
digər Azərbaycan diaspor təşkilatlarının da xidməti
olmuşdur.Fəaliyyətimizi yaşadığımız ölkədə istər
Türkiyə azərbaycanlıları, istərsə də İran vətəndaşı
olan azərbaycanlılarla birlikdə davam etdirmiş,
idman və folklor sahəsində Azərbaycanın tanınması
uğrunda mübarizə aparmışıq. Amma, Avropada Azərbaycan
diasporunun möhkəmlənməsi və güclənməsi uğrunda
müəyyən çətinliklərlə də rastlaşırıq. Biz gənc həmvətənlərimizlə
yeni bir proyekt işləyib həyata keçirməyi qərara
almışıq. Artıq elektron kütləvi informasiya vasitəmiz
olacaq www.diaspora-az.com ünvanlı saytımızın köməyi
ilə fəaliyyətimizi daha geniş coğrafi ərazilərə
yaymaq və dünya azərbaycanlılarının təşkilatlanma
prosesini gerçəkləşdirə biləcək addımlar atmaq niyyətindəyik.
Yəni, təqdim olunan sayt dörd dildə-Azərbaycan,
Fransız, İngilis və rus dillərində olacaqdır. Saytda
Azərbaycanın mədəniyyət tarixindən, Avropaya edilən
mühacirət, Lobbiçilik fəaliyyəti,Azərbaycan Respublikasının
idman sahəsində, xüsusilə Olimpiya idmanında qazandığı
uğurlar, Xocalı faciəsinə aid statistika, Azərbaycan
mətbəxi haqqında çoxlu informasiya vardır. Saytda
həmçinin iki foto albom da yerləşdirilmişdir. Azərbaycan
Respublikası prezidenti Heydər Əliyevin xaricə etdiyi
səfərlər, Dövlət Gömrük Komitəsinin sədri Kəmaləddin
Heydərovun Ümumdünya Gömrük Təşkilatının Baş Katibi
Mişel Dane ilə görüşləri və Azərbaycanın ictimai-siyasi-mədəni
sferasını əks etdirən bir çox fotoşəkillər mövcuddur.
Bülənt Gürçam saytın zənginləşdirilməsində Azərbaycanda
yaşayan həmvətənlərimizin yardımına böyük ehtiyacı
olduğunu vurğuladı. Saytın təqdimat mərasimindən
sonra «Azərbaycan Evi» cəmiyyətinin yaradıcısı Bülənt
Gürçam jurnalistləri maraqlandıran çoxsaylı suallara
cavab verdi.
Nail Abdullayev
«Gömrük» qəzeti,
12 may 2002-ci il.
